Nula tlangval te tan

Ka tleirawl chhuahhlim chuan leng U (val & nula upate) hi mak ka ti thin khawp mai .Engvange nupui pasal an neih loh? tiin ka lo ngaihtuah buai fo thin.Ka mihriat Valupa pakhat phei chu amah Bemtu NULA pawh a nei nual , nei ve mai turah ka ngai a a nei mai lo tlat mai. Engvang nge ni tih ka'n zawh chuan ... atan chuan nupui neih kha phurrit a nih thu min lo hrilh hleuh mai zu nia.Nupa nihna piah lama mawhphurhna tamtak hmanchhawn turin inpuahchah a ngai a ni maw? tih ka hriatphah uar ta mai.

Kan tih fuh loh nia ka hriat te:

Hnam fing angin inchal tum er teh mah ila kan thiltih phung reng hian kan la hnufual zia a ti lang fo thin niin ka hria. Kan NU leh PA te hun kha chu sawi phak a ni lo.Mahse keini hunah tak ngial pawh eitur a awm hma hauh hian eitu tur tih pun chak em em tlangval thaza tak tak hi (nupui chu eitu atan chauh va lak luh an ni tih a kawk kher lo a nia )kan tam em em thin.Hmangaihna chawivawng hlur a chhungkua kan han din tawp thin hi chu kan dawnthui lo deuh lo maw?.Hetiang na na na chu fanau kan han nei a nupa pa a eibar zawnga feh chhuah a lo tul a, kan rila rah kan fanau te thenawmte kawm pawn vela kan tlat tir a, kan sum zawn buai ah kan fate'n eng nge an tih thin tih pawh kan hre hek lo.
Thing leh lung delh loh na na na chu an rawn thang lian ve a , nu leh pate thlazar hnuaia sei lian lo na na na chuan khawlai nun an lo than hnan der tawh a. Chutih hunah pawh chuan NU LEH PA TE chu sum zawn buaiin kan la buai a.Nu leh pate thlazar hnuaia lehkha zir hman lo na na na chuan mahni tal talin an lo tal ve a...hetih kar hian naupang thenkhat te chu tha ve tak pawh an awm , mahse a tamzawk hi chu khawlohna thisenin zungzam a fan raih raih tawh mai a ni.Chutah pawh NU leh Pa te kan la harh lo fo va...khawnge " mami /mama hi a naupan lai khan kan rethei em a...ka duat hman silo tiin" sum kan neih ang ang kan vurh tan ta a...hetah chiah hian a pawisa kha a tipawi zual thin.Engvang chuan maw? Ehh!! kan fapa leh fanu te an pian tirh atanga an tleirawl chhuah thlengin kan thlazarhnuaia uap lum hman lo na na na chu an rilru kan man lo , tin, pawh/tlang /dik takin an thiltih tur min hrilh ngam ringawt hlei nem! A naupan lai tang khan zirtir hman lovin sumzawn lamah kan buai em a lawm !Dikna ngaina turte , aiupa zahthiam turte,Tawngtai thlahthlam lo turte leh Sum hmandan thiam turte khan kan zirtir hman lo tlat a lawm.Hetiang vang hian khawtalngah buaipui tham fe fe fa kan nei thluah zawng a nih hi!

Hei mai hi a la ni nem! mami/mamate'n an naupan lai a zawhna min zawh thin " A NU /A PA heihi Engvang nge ? Engtin nge?Eng tik ah nge? Khawiah nge? adt zawhna chi tam tak an zawh thin che khan engtin nge kan chhan thin kha? Atam zawk chuan Naupang hriat a tul lo! emaw Ve a che! in kan chhang thin . Hetianga an thilthar hriat chakna kan lo tih bulh hmak hmak thin vang hian an rawn puitliang chova ... zirna kawngah hlawhtlinna tak tak an phur chhuak zo tawh thin lo.Tunlai thilthar ngaihtuah/siamchhuahna khawvel ah hian kan fate'n hnuhma an neih theih loh phah hial a ni. Apple kung atanga APPLE lei a tla thlir liam ta mai lova :Engvanga tla nge ? a nih tia Dilchhut taka chhui chiangtu Miropui NEWTON-a kha kan lo hre ve lo pawh ni fa hmiang!

Tin, sumpai tlachham reng renga chhungkua din na na na chu NUPA kar thu chhiat chang a lo awm thin , fanaute benghriat mai nilo mit ngei maia an hmuhtheih ah NU PA kan in kawt deuh tuar tuar mai thin te hian kan FATE hmakhua kan tih thim sak leh thin.Lehkha zirlai an nih phei chuan zirna thlengin a nghawng chhe vek thei tlat a ni.Chuvangin chhungkua dinna ah hian sumpai hian hmunsang a luah pha tlat tih hre tlatin chhungkua din hma ngeiin i khawlkhawm sa ang u.(tamtak tihna zawng a ni lo ve)



keini thangtharte hunah chuan a chunga thil tlemte thupui tak tak hi hre reng i la tha dawn mange aw! Aw tlangval te u kan kawppuite tan innghahna tling khawp kan nih hma chuan chhungkua i din mai lo vang u. Nula te u fate pa tur hi i hmangaih ringawt khan duh tawk mai rih lo la...hmangaih chung reng khan chhungkua pakhat chawm thei tur khawp a innghahna tlak a nih hun thleng tha leh chakna pe chung zela rinawm takain nghak hram hram ang u hmiang! Tin, Nulate U keimahni ah ngei pawh hian hei hi inchik fo thin ang u " ka fanau lo piang turte tan NUTLING ni thei turin ka inzir tawk fawng tawh em ? "tih hi . Chuti a nih loh zawngin ka fate lola piang turte hi khawvel thiamna/finna lama hnuh luh aiin a thim lamah kan nawrliam mai palh ang tih pawh hlauhawm tak a ni e.

Tichuan , hengte hi i hre tlat ang u.....
Kan vela Naupangin Dil chhut taka thil min zawh hunin kan hriat ang ang chu tha taka chhan i zir ang u....
Kan vela naupangte'n zawhna thar an siam thiam zel theih nan i zir tir thin ang u
Eitur a awm hmain Eitu tur in lak luh hi ...i simthar ang u...

MAY MYO SANA PUI

by lalrammuani&lalramlawma

Pyin Oo Lwin (May Myo) chanchin:
May Myo hi Mandalay khawpui hmarchhak lam mel 42 a hlaa awm a ni a, motor-in darkar 2 chhung tlan a ni. Tuifinriat zawl atang feet 3506 a sangah in hungin, khawpui mawi leh nuam tak a ni.

A Hming: Aung Me Tha Bon lungphuna inziak dan hmangin;1787 khan Pyin Oo tih hming puin khaw te tak te a ni a. Kum 1850-ah Pyin O Lwin tia hming thar vuah a ni. 1886 Nov. atang bawrhsap kut hnuaiah awmin he mi kum vek hian No.4 Banglar Infantry Battalion hotu Colonel May a rawn thu a. Tichuan 1896-ah May a hming chawiin May Myo (Maya khawpui) tiin hming thlak thar a ni.

Tin, 1944 Sept. 8 atang 1945 March 15 inkar chhung khan Japan kut hnuaiah awmin Pyin Oo Lwin tia thlak leh a ni. Amaherawh chu, Japan an tlawm hnuah May Myo tia thlak leh a ni. Chuta tang chuan hun inher zelin 1989 Nov. 17 khan Ministry of Home & Religious Affair thu chhuak chuan Pyin Oo Lwin tiin a rawn thlak leh ta a, chu hming chu tun thlengin a la pu ta zel a ni. Pyin Oo Lwin (May Myo) khaw pian ni hi 1896 April 30 a ni.

May Myo khua hi tunhma chuan Shan state a tel a ni a. Mahse kan pu Nay Win-a khan scheme lian tak neiin Moegoke khua nen hian Mandalay division ah a seng lut a ni. British kut hnuaia Burma a awm atang May Myo hi cheibawl tan a ni, a khua zau lam hi square mile sawm pasarih a ni. Sipai lama inzirna hmun pawimawh tak a ni a, Burma rampum huapa kan neih chhun Defence Service Academy leh Officer Training School awmna hmun a nih vang pawh hian a hming thang lehzual.

Ram vawt a nih avangin phaizawla awmte chuan nuam ti vak lo mahse British leh Europe ram mite chuan nuam an tih em avangin hmun nuam ni turin an cheibawl ta a ni. Pangpar khawpui tia an koh mai thin May Myo-ah hian National Park (pangpar huan) mawi nuam em em mai a awm a, May Myo khawpui timawi zualtu ber a ni. Mandalay Mizo Student Fellowship memberte chuan tlawh lovin kan awm thei lo .He park hi sap kut chhuak tho a ni a, centenary hmang tawh a ni. Jubillee a lo thlenin ram chhunga zai thiam hming thangte sawmin ropui takin an hmang thin. Tin waterfall mawi tak tak a tam hle a, feet zahnih a sangte pawh a awm.

A Kalkawng: Inkalpawhtawnna a tha thawkhat hle a.Yangon-May Myo flight a awma, Mandalay-Lasho rel kawng kianga awm a nih vangin Mandalayy atang rel (train)-in a kal theih bok. Mak danglam ve tak pakhat chu Mandalay - May Myo motor kawngah hian kawngkawi chhawng ruk a awm a, a mawiin a mak danglam hle a, accident tamna hmun ber pawh a ni. Bike nena lenglam nula tlangvalte hian he kawngkawi inchhawrdawh mawi tak mai tlai ni nema han thlir dun paha thlalak te hi nuam an ti thei em em a. Kut insuih rial chunga ral khata Mandalay khawpui lo lang pe un mai thlir dun te chu nuam an ti em em a ni. Kei pawh nuam ka tiin ka ngai thin thlirpui lenrualte.

Chin mi (zo hnahthlak) in 300 tha vel an khawsa ve a, inpawhna tha tak nei thei tura hma lak zel tum a ni. Tin, kan ram chhunga boarder school hming thang tak Sa Pann Einn te,Soe San te,leh a dang tam tak avangin ram chhung hmun hrang hrang a matric chhang turte fuankhawmna hmun kan ti thei bawk ang. Kumin 2008-ah ngei pawh Tv; Lalramzaua Falam (Bochung khua)-in Soe San a tang 6D a hmu a, a thlalak lian tawk tak kawngpui kam (border hma )-ah tar chhuah a ni. Kei chuan en nawm ka ti hle. May Myo hi khawpui nuam tak a nih vang hian ram hruaitute mai ni lovin, mi hausa te’n chawlh lakna hmun atan an la hmang reng a ni. Tourist leh mikhual, he khawpui tlawhtute chuan pangpar huan (park) leh a khawpui fan vel nan hian Sakawr tawlailir mawi danglam taka chei mawi chu lenvah vel nan an hmang thin.

Sanapui Pali (Purcell Tower):
He Sanapui hi 1934 khan King George V (bawrhsap) lal thut champha kum 25-na hriat-rengna atan Gillete & Johnson Co.-in an siam zinga mi a ni. May Myo a dah a nih theihna tura mawhphurtute chu Mr; Purcell leh Magistrate Mr. M. Azin te an ni. Tichuan a hunna tur in sang satu tur leh tul dang buaipui turin kum 1935 khan Rangoon khawpuia in nghat Clark & Graig Co. chu mawhphurhna pek a ni. Kum 1936 Sept. khan hawn a ni a, a lo buaipuitu Mr; Purcell-a hming chawiin “Purcell Tower” tia koh a ni (Mr;Purcell a hi Armenian mi a ni, a pu leh pi te atang tawha siangpahranga kulh chhunga duh duha lut chhuak thei, sumdawng mi hausa chhungkua atanga lo piang a ni).

Tower san lam hi feet 75 a ni. Chhim leh hmar, chhak leh thlang hawiin sanapui (a lai hawlh tlang feet 4 leh a chanve) pa khat theuh dah a ni. Sanapuia thir hman zawng zawng ton 3 vela rit a ni bawk. Tin minute 15 zelah rimawi awmze nei a ri thin. A rimawi hi a danglam bik em em a, tun lai sanate nen inang lo takin a dar zat vuak ri hi mawi an tihzia a hriate hrilh fak a tling. Chung a rimawi awmzia te chu:
1. LORD, through this hour, (00;15)
2. Be thou our guide, (00:30)
3. So, by thy power, (00:45)
4. No foot shall slide (00:60)
te an ni. He rimawi dangdai tak hi Buddhist puithiam ho hian ngaih pawimawhah an nei lem lo. He sanapui hian vawiin ni thlengin hun a la vawng dik a, a upat tawh zia ngaihtuahin tar hmel leh tuiek hmel pawh a pu lo hi a mak hial zawk a ni. Mahse thla ruk vel kal ta atang khan a aw rawl zai mawi tak chu a ri chhuak thei ta lo. Tunah chuan May Myo khaw mipuite hun chu ngawi renga chhiar sak kauh kauh chu a tih theih tawk a lo ni ta a ni. Sanapui an hawn tirh atanga tun thlenga enkawltute chu “Atcha Brother” sana siam chhungkua te an ni. Tun thleng hian sanapui bulhnaiah in tha tak neiin an khawsa a ni.

Tlipna:
May Myo park-ah chhemdam thlifim dawng chunga, Sirva hram thiam, thing hnah nem phe siau siau leh lengkir sur ri seng seng han thlir meuh chuan siamtu chung Pathian them thiam zia fak loh rual a ni lo. Par zu tlan vahkhua leh phengphehlepte chuan he pangpar huan hi an va han mawi tak em! In-di rial rial chunga vala te’n an lung di banah kaia lungchimtea biahthu an hlan ri leh lengi nui ri te chuan dam chhung nun hlimna leh lawmna, hmangaihna an puang chhuak mawlh mawlh mai a ni. Chu mai bakah May Myo Sanapui rimawi dangdai tak khan Lalpaa chawlh hahdam thlak zia min hriattir thin.

Rei lo te emaw tih chhungin khua a lo tlai a, tlai ni tla tur lenkawl sen ruai leh Purcell tower han thlir hian, min hriat chhuahtir hmana fam min chan san Capt. C. Khuma kha! Han tho lehin Par khawpui hi fang leh sela zofate tan thu ngaihnawm min hnut chhiah leh ngei tura, A dam lai nite he ‘May Myo Sanapui’ hian minute tin leh second tin a lo chhiar sak kauh kauh tawh thin angin keini thang leh tharte pawhin a sulhnu leh kut chhuak, a ngaihtuahna far chhuak chhiarin Zo literature hmatiang sawn zel se kan ti.

Source:
1. Pu R. Thangchhuanga (Interview)
2. Pu B. Lalthangliana lehkhabu- “Rev. Dr. Zairema leh Capt. C. Khuma Hnuhma”
3. Burma encyclopedia.
4. May Myo Khaw Jubilee Magazine

(He article hi www.chhaktiangzirlaite.info a mi lakchhawn a ni. Ed)

LAL PA I TA KA NI

Thian te u,in nitin nun hmanna ah thil tha nge in tih thin thil tha lo?
Tunlai khawvel kan hmanna ah hian ,kei ni kristian thalai te hian thil tam tak kan ngaih thah ta niin a lang tlat.Tun lai inbiak pawhna awl sam leh media tamtak hian sualna kawng mn zawh tir a ang ta tlat mai.
Kei ni kristian thalai te hian kan pathian hnen sual hnehna a awm tih hriain hma lan i pan zel ang u.Mahnita kan ni tawh lo va lalpa ta tih hre tlatin hma lamah krista hung zuiin ke i pen ang u hmiang........

LAL PA I TA KA NI

Thian te u,in nitin nun hmanna ah thil tha nge in tih thin thil tha lo?
Tunlai khawvel kan hmanna ah hian ,kei ni kristian thalai te hian thil tam tak kan ngaih thah ta niin a lang tlat.Tun lai inbiak pawhna awl sam leh media tamtak hian sualna kawng mn zawh tir a ang ta tlat mai.
Kei ni kristian thalai te hian kan pathian hnen sual hnehna a awm tih hriain hma lan i pan zel ang u.Mahnita kan ni tawh lo va lalpa ta tih hre tlatin hma lamah krista hung zuiin ke i pen ang u hmiang........